ENTRADA DE DOSSIER TEMA 5

 

Benvidas e benvidos ao blog un día máis! Hoxe gustaríame compartir convosco un pequeno resumo e reflexión das actividades que levamos a cabo na aula para tratar o tema 5 da materia.

 

O tema comezámolo cun pequeno repaso do currículo facendo unha actividade sobre as competencias que consistiu en traballar por equipos para crear actividades que favoreceran a adquisición das 7 competencias por parte do alumnado. No meu equipo decidimos crear unha soa actividade que englobase todo: os alumnos debían facer a presentación dun produto no mercado estranxeiro. A CSC basearíase na estruturación dos equipos e na división do traballo. A CLC aplicaríase durante a presentación oral e a comunicación dos membros. Ao realizarse a presentación cunha ferramenta dixital, tamén practicarían a CD. A CMCT obteríana ao estudar o mercado e o PIB do país no que queren introducir o produto. O alumnado desenvolvería a actividade por si mesmo e empregaríanse metodoloxías activas, polo que tería grande importancia a CAA. A CEC traballaríase estudando a cultura meta e comparándoa coa orixe para garantir unha boa adaptación do produto. Por último, os alumnos serían os encargados de escoller o produto promocionado, tomar as decisións sobre a presentación e xestionar o proxecto, mostrando a súa CSIE.

A continuación, metémonos de cheo no mundo Kahoot. Para quen non a coñeza, Kahoot é unha plataforma que nos permite crear cuestionarios sobre o tema que queiramos para empregalos na aula. Ten unha interface moi interactiva, intuitiva e rechamante e pódese xogar por grupos ou individualmente. No noso caso, propúxosenos un cuestionario individual sobre o currículo en ESO, Bacharelato e FP. Persoalmente, Kahoot paréceme unha plataforma entretida, pero comparto a opinión de algúns dos meus compañeiros que se cuestionan se é bo fomentar este tipo de competitividade no alumnado. Penso que, no caso de empregar esta ferramenta na aula, eu faríao dividindo aos alumnos por grupos pequenos ou xogaría directamente co total da clase para facer o repaso dun tema entre todos. De feito, na segunda sesión sobre este tema volvemos empregar o Kahoot de maneira grupal e os resultados foron mellores.

 

 

Finalmente, o traballo cos materiais teóricos do tema fixémolo creando unhas presentacións por grupos que posteriormente expuxemos na aula. Aquí vos deixo a do meu grupo sobre a FP. Ademais, autoavaliámonos entre os grupos seguindo unha rúbrica e dándolle feedback positivo aos compañeiros. Na segunda clase seguimos tamén este tipo de metodoloxía activa, pero nesta caso traballamos conxuntamente na creación dun powerpoint sobre a EOI que exporemos na seguinte clase.

En conclusión, nesta materia estamos empregando a metodoloxía de traballo por proxectos na que o alumnado pasa a ser o creador do seu propio coñecemento, no canto dun mero espectador. Penso que é unha boa decisión, sobre todo cando se trata de materias de carácter moi teórico, que doutra maneira lle poderían resultar moi pesadas ao alumnado. Así mesmo, a publicación deste tipo de entradas busca a asimilación do contido visto na aula e a reflexión posterior.